恆春中元「豎孤棚」欲開辦 今年燈篙徛26米懸
加入公視會員，
按讚收藏你關注的報導
發布時間：
更新時間：
後禮拜六（9/6）就是中元節，屏東恆春的傳統民俗活動「豎孤棚」，今日（8/28）先進行徛燈篙的儀式。公所講，將這支26米懸的竹仔tshāi起去，代表向好兄弟發出邀請，歡迎怹到時來享用供品，同時也祈求今年的活動會當順利圓滿。（新聞標題、導言及內文皆為台語文）
主辦單位：「懸懸攑起來矣。」
吊車勻勻仔將竹仔搝懸起來，準備欲來進行徛燈篙儀式。這支竹仔總長26公尺，是主辦單位真無簡單去高雄山區揣著，一路派交通管制載轉來恆春的。2025年的恆春豎孤棚活動，按算8/31正式起鼓，主辦單位8/28早起先來徛燈篙。公所表示，這支燈篙就親像是基地台抑是帖仔仝款，tshāi起去了後，附近的好兄弟仔看著，都會知影遮有攢好料仔欲款待怹，燈篙愈懸，呼叫的範圍愈闊，祈求好兄弟庇佑，今年的活動順順序序。
民眾：「這是對佗位，高雄來的，那瑪夏，干焦那瑪夏有。」
今年的豎孤棚比賽攏總有17隊報名參加，公所講，因為核三廠停紡，予今年的活動補助金對原底的250萬減甲賰50萬，佳哉有縣府佮濟濟單位的鬥相伨，將這个差額補起來，予這个對清朝流傳到今的活動，會當鬧鬧熱熱辦落去，尤其今年是恆春建城150週年，意義特別無仝。
屏東縣恆春鎮長 尤史經：「共這个百年傳承繼續延續落去，然後猶是頭拄仔講的，就是敬鬼神的意義包括佇內底，然後祈求恆春所有的鄉親攏會當平安。」
公所表示，豎孤棚比賽是佇9月初六，中元節正日彼工來辦，毋過對8/31起，恆春遮都有一系列的活動，歡迎民眾鬥陣來感受這个有百年歷史的傳統民俗文化。
記者 許猛㨗 許嘉茹 邱紹揚 屏東採訪報導
唐嘉良/編輯
