臺灣消費者保護協會18號發表一份檢驗報告，針對市面上的枸杞，攏總30件，進行重金屬的檢驗，想袂到全部攏驗出鉛佮鎘，甚至有兩件閣是有機的。消保會表示，目前現有的法規，無針對枸杞去制定重金屬的標準，民眾若長期咧食會傷身體，呼籲食藥署愛重視這个問題。
一包一包的枸杞乾囥佇桌頂，攏總三十件，有對網路平台買的，閣有誠濟件是連鎖大賣場賣的，但是遮些枸杞乾全部攏予台灣消保協會驗出鉛佮鎘，其中有兩件甚至閣徛名有機枸杞。協會講，若用農糧署的標準來推算，成年人每工袂使食超過20公克，有身的人、囡仔佮腰子ﰴ的民眾，袂當超過10公克，有民眾聽著這个消息講，後回毋敢閣買矣。
民眾林先生:「三十間攏有喔，遮恐怖喔、這後改我哪會閣敢買，lo̍h啊lo̍h啊」
因為有人是提枸杞乾來泡茶養生，有人是煮菜會參一寡仔，協會表示，因為鉛佮鎘若食落腹肚僫代謝，長期食會對身體造成敗害，因此消保協會建議民眾，若準有需要，會使揣中醫提。
台灣消保協會醫事專委劉麗芬:「我個人建議是愛揣合格的，遮所謂的有提出檢驗報告的漢藥房。」
高雄市立中醫醫院醫師 陳嘉程:「因為阮中醫的枸杞就是用藥品來分類，比如講伊的檢驗標準佮食品的標準是無仝款的，所以相對來講，藥品的檢驗規格就會比食品的檢驗規格較懸。」
協會建議，中央應該愛修法，對源頭管控枸杞乾的重金屬標準，對此食藥署表示，針對枸杞乾的部份，農業部有相關規定，會當用焦燥率4倍去推算，按呢枸杞乾的重金屬標準，鉛是每公斤0.4 毫克，鎘是每公斤0.2毫克。
食藥署北區管理中心主任鄭維智:「佇檢視消保協會的抽驗結果了後，鉛攏小於每公斤0.4毫克，鎘攏小於每公斤0.2毫克」
食藥署強調，若是焦燥過的產品，攏愛用農業部定的焦燥倍數去推算敢有合格，針對這擺民團公佈的結果，並無超過標準。
記者 許嘉茹 邱紹揚 高雄報導(新聞標題、導言及內文皆為台語文)