大水雨毋但造成交通佮農作物受損，臺南的2搭國定古蹟，府城城門的南門段舊城壁佮三山國王廟，也攏受著大水雨損蕩。其中南門段的舊城壁有30米崩去，市府昨昏（8/7）緊招專家學者來會勘，決定會分三階段來搶修。（新聞標題、導言及內文皆為台語文）
台南女中總務主任 林彥廷：「遮大概到150公分。」
主任實際提尺出來量，共逐家講圍牆到底崩外深。台南女中倚樹林街這爿的圍牆仔，有大約八十公尺長，是國定古蹟，府城城門南門段的舊城壁，今年五月才拄辦建城三百年的紀念活動，毋過初六校方雄雄發現，這堵舊城壁哪會變敧敧，有30外公尺崩去，趕緊通報市府，現場也先搝封鎖線，避免發生危險。
台南女中總務主任 林彥廷：「連日的大水雨，致使伊遮有一寡仔小小的必巡，毋過因為一直有雨水沖對下面去，所以會造成這擺的狀況。」
市府表示，35年前有整修過一擺，初七佮專家學者會勘了後決定，會分三階段來搶修，按算後禮拜會來進行加強固定的作業，欲按怎恢復古蹟的原貌，也予伊會當應付極端氣候的挑戰，怹也會來好好仔研議。
台南市文資處有形文資組代理組長 蘇琳傑：「有一寡仔必要的加固抑是防護的措施，因為佇文資法內底就有規定講，必要的結構補強是會當採用的。」
仝款受著極端氣候挑戰的國定古蹟，猶閣有台南的三山國王廟。有將近三百年歷史的三山國王廟，佇2023年完成修復，才過無兩年時間，這擺的風颱佮大水雨煞予廟裡變按呢，塗跤淹水、厝頂漏水，廟方講，古蹟修復限制一堆，較早厝頂有做天溝鬥排水，修復了無鬥，就淹水矣。
廟方人員 李志文：「尾仔來無鬥起去，你看落雨、風颱啥物貨，規間攏水。」
台南市議員 蔡宗豪：「阮愛要求中央佇針對文資審查的制度上，應該愛閣納入一寡天氣氣候的因素，排水系統應該愛共伊做閣較完善，無應該共伊減去。」
議員表示，文化部堅持愛將古蹟恢復原貌，修復工程無設置排水系統，這款做法毋但無合理，顛倒造成古蹟受損，向望相關單位愛趕緊來改善。
記者 李晨宇 許嘉茹 邱紹揚 台南報導