這改丹娜絲風颱予臺南蘭花損失超過20億。業者表示，蘭花對細欉種到開花、會當出貨，需要2冬的時間；這馬蘭花因為風颱受損蕩，價數按算會起2成。業者希望政府鬥相共，予這項世界有名的產業早日恢復。（新聞標題、導言及內文皆為台語文）
丹娜絲風雨掃過南台灣已經一禮拜外，園區內的花矸猶是碎糊糊，連蘭花栽仔嘛搧甲糜糜卯卯。加上彼幾工閣停電，致使溼度提懸，日頭一出來，內底的花會生菌，甚至有的葉仔嘛會發烏爛去。臺灣蘭花生物科技園區遮的業者，估計損失超過20億，園區理事長講，這回對整個蘭花業造成真大的打擊。
臺灣蘭花生物科技園區理事長 戴成文：「第一就是川普的問題，關稅的問題，閣來就是風颱的問題，閣來是匯率的問題，這攏是造成阮足大的一个壓力；閣有現有逐家這馬欲復建的壓力。」
世茂農業生技副總經理 李佳家：「（蘭花種的）伊的時間足長，伊的周轉率較慢，所以講佇咧庫存的壓力，這就是阮的資金鍊的壓力，所以對阮來講會影響較大。」
種蘭花對栽仔到開花出貨，上無愛兩冬的時間。若這个園區內多數攏是已經一冬半矣，風雨造成真大的損害，予濟濟業者心肝咧滴血。這陣怹只好先趕緊搶救閣會當的栽仔予焦，救偌濟算偌濟。這嘛連帶影響整個供應鏈，殯葬業者表示，蘭花是喪事常在咧使用的，這擺彩色品種已經出現欠貨現象，價數按算會起兩成。
臺南市葬儀商業同業公會理事 陳冠宏：「阮這馬逐間攏足欠花，欠花了後變做阮調花嘛困難，價數嘛閣較是貴，變成是真濟人咧搶花。目前市面上攏是欠色花，有顏色的花較濟；白色因為逐家攏是基本花會種較濟。」
另外，切花的市場，這回白花的損失，也會影響著日本市場，因為日本50%以上攏是對咱臺灣出去的。業者嘛講，按算愛一冬半至兩冬，蘭花產業才會當沓沓仔恢復，怹嘛希望政府幫助蘭界，無論是補助、貸款，抑是展延還款期限，通予蘭界一个重生的機會。
記者 李晨宇 臺南採訪報導