高雄市農業局最近推出「台灣猴資料分享平台」，民眾會當透過手機仔的通訊軟體去回報，當時、佇佗位、看著幾隻猴、咧做啥物，共這寡資料收集起來，透過科學方式和民眾做伙建立一个臺灣猴的活動地圖，成做日後規畫防治措施的參考。（新聞標題、導言及內文皆為台語文）
拍開手機仔，揣出這个上新的台灣猴資料分享平台，將你看著的台灣猴數量、地點、時間，猶閣有台灣猴佇咧做啥物，遮的資料攏會當通報去網路。這是高雄市農業局當咧推捒的新平台，向望透過公民的力量，逐家鬥陣來收集壽山台灣猴活動的資料，當做日後防治措施的參考。民眾認為，以早攏是請學術單位佇固定地點調查，致使研究資料受著限制，換用這款全民通報方式，上重要是愛先做好宣導。
民眾 蔡同學：「大數據（會當）知影，臺灣猴大概會出現佇佗一搭，然後會當分享予逐家知影，可能有佗一个所在愛較注意。」
民眾 蘇先生：「你一定愛有上網通報的習慣，一般人大概無這款習慣。」
就是因為拄開始做無啥人知，農業局也佮台灣猴共存推廣協會合作，佇壽山四箍輾轉的社區去辦講座，除了紹介這个通報平台，嘛有教民眾愛按怎佮台灣猴鬥陣。農業局向望，透過全民做伙來通報，會當減少民眾佮台灣猴的衝突事件。
高市農業局植保科長 黃群中：「欲了解怹的軌跡，咱就會當用較好的方式，來做一寡仔防治的措施，減少民眾佮猴之間的衝突。」
台灣獼猴共存推廣協會秘書長 林美吟：「我嘛希望這个平台會當予逐家了解講，其實猴落山是正常的，怹本來就愛互相溝通，毋是講伊落山就是無正常的，抑是想欲提人的物件按呢，予猴的資訊會當閣較流通咧。」
農業局表示，平台的資料需要時間沓沓仔來收集建立，現階段可能無法度馬上看著效果，毋過對長遠的政策推捒來看，絕對是有幫助的。
記者 許嘉茹 邱紹揚 高雄報導