霧臺大武村便道袂通 百外人牢佇部落等搶修
發布時間：
更新時間：
高雄屏東大雨落袂停，包括山區佮平地攏出現交通中斷的狀況。其中屏東霧台鄉大武村有便道路基流失，大約有一百人受困佇部落，小琉球的交通船也因為風湧傷大，7/10下晡全部停駛。另外高雄山區誠濟所在攏有塗石跙落、溪水漲起來造成交通中斷，主管單位呼籲，民眾毋通去山區，避免發生危險。（新聞標題、導言及內文皆為台語文）
小琉球的交通船當欲駛出港，毋過大湧一陣接一陣拍過來，予規隻船幌懸幌低，船頂的旅客也綴咧哀哀叫，初十下晡屏東東琉線的交通船因為風湧傷大，海面上閣有濟濟的水流柴，為著安全設想，下晡三點過後的船班全部取消。
東琉線航運業者 冀慶生：「山頂沖落來的水流柴，閣有一寡漂流物 雜物等攏足濟的，水也誠掣流，這也造成阮佇航道頂懸，會有一寡較危險的狀況。」
因為山區雨落袂煞，初十中晝，霧台的雨水量已經破570毫米，佇阿禮部落佮大武部落攏有路斷去，其中大武村唯一的聯外道路，霧大二號便道，用來做地基的涵空，去予大水沖斷了了，目前有上百人受困，村長第一時間也先向外界報平安，目前人攏誠安全，存糧也暫時無問題，感謝各界關心。
屏東縣霧台鄉大武村長 麥庸正：「阮村有兩个重大傷患者，阮是用接流的方式，予(部落)青年落山先去替ﰀ領藥仔，目前(狀況)攏已經穩定矣，所以非常感謝逐家的關心。」
高雄的山區，也因為雨水量攏超過300毫米，下晡已經有92條土石流的紅色警戒，明霸克露橋也因為塗石一直輾落，目前公路局是派怪手佇現場顧，只要雨有閬縫都會隨處理，而包括茂林、桃源、那瑪夏攏有小範圍的塗石崩坪阻礙交通，另外荖濃溪溪水暴漲，淹起來台20線路面，公路局也緊急封路。
高市桃源區復興里長 江孫財：「規條道路欲開始崩岸啊，所以較停仔愛細膩。」
山區掣流的溪水也做一擺趕落來到平地，佇阿蓮、田寮嘛有溪水暴漲，強欲淹過橋面，湖內分局也緊急封橋，等待水退確認安全了後，才會開放通行。
記者 許嘉茹 許猛㨗 邱紹揚高雄屏東報導
鄭安琪/編輯
823公投》重啟核三，你怎麼看？
