高雄市調查處113年接著線報，講有駭客偷提消防局緊急救護系統的資料，提供予殯葬業者使用，會當先去搶生理。調查處表示，姓潘主嫌創一个平台，逐個月收幾千到幾萬不等，和殯葬業者配合；除了高雄，業務範圍閣擴大到外縣市。目前主嫌已經夆收押禁見，全案地檢署也當咧追查。（新聞標題、導言及內文皆為台語文）
消防人員接著報案講有車禍，趕到現場欲將受傷的民眾送去病院。無論車禍、急病猶是其他需要救援的案件，攏會記錄佇消防局的即時案件網站頂懸，目前除了雙北，所有的縣市攏是用消防署的這套系統，毋過高雄市調查處舊年接著線報，講有駭客破解系統，將救護的案件、詳細的時間地點，提供予殯葬業者，予怹代先別人去現場搶生理，市調處追查，今年三月份先掠著姓潘的主嫌，頂個月閣再發動兩擺搜揣，將相關的殯葬業者佮電腦工程師約談到案。
高雄市調查處副主任 馮智雄：「除了潘嫌佇第一波行動時，已經予臺灣高雄地方法院同意羈押，其他的張嫌等殯葬業者，分別以新臺票3萬至50萬箍不等的金額，交保候傳。」
目前高雄市有登記的殯葬業者，有將近一千五百間，一般來講殯葬業者攏是搶緊、先到先贏，這擺的案件是因為姓潘的主嫌捌駛過民間救護車，對這套系統誠了解，嘛知影業者的需求，所以才會想空想縫偷提資料做生理。殯葬管理處呼籲，業者做生理愛行正途，毋通用不正當的手段拍歹市草。
高雄市立殯儀館委外業者：「怹到的時陣，抑是有先來後到，就揣一个人對時間，可能先到的，怹都會當先佮家屬做溝通的問題。」
高雄市殯葬管理處長 黃中中：「莫用一寡較無好的手段，去提著相關的資訊。」
除了高雄市以外，對111年開始，姓潘的主嫌用仝款的手路，共生理做到外縣市去，逐年連線偷提資料超過三千萬擺，高雄市消防局表示，已經加強相關的資安維護，嘛有建議中央，愛針對系統加強資訊安全。
記者 許嘉茹 邱紹揚 高雄報導