臺灣的流行音樂，是對日本時代1930年代開始發展，親像〈四季紅〉、〈月夜愁〉、〈望春風〉等等，攏是流傳欲百年的流行歌。為著欲予民眾了解臺灣的流行音樂史，台北流行音樂中心舉辦《摩登時代》特展，展出1930年代上百件珍貴的文物。（新聞標題、導言及內文皆為台語文）
歌手 許富凱：「純純珈琲，洗浴想思，想思離，清眠無夢去過暝。」
歌手許富凱唱的這條〈巴西喫茶店〉，歌詞的創作者陳君玉，是日本時代古倫美亞唱片公司的文藝部長，是1930年代開創臺灣流行音樂，真重要的人物。今經過90年〈巴西喫茶店〉這个毋捌發表過的作品，經過台北流行音樂中心董事長黃韻玲，為詞寫曲，咧《摩登時代》特展開幕這工，對外發表。
臺北流行文化中心董事長 黃韻玲：「咱臺灣流行音樂，其實發展到這馬逐日有新款，逐工攏有真濟新的，對流行音樂真濟熱情的人想欲入來。毋過我認為應該加減愛了解一下仔，臺灣流行音樂的歷史來源。」
親像四季紅、月夜愁、望春風等等，攏是對日本時代唱到今的歌曲，這改《摩登時代》特展，除了通看著濟濟百年歷史的留聲機、曲盤，然後佇咧陳君玉和鄧雨賢的家族後輩、學者等等的協助之下，嘛提供大量創作手稿、相片、報紙雜誌等等，攏總超過百件文物。
陳君玉家族後代 陳生：「伊的一寡文獻資料，嘛有伊的彼个劇本，伊猶閣有劇本佇咧，猶未呈現咧世人的面前。所以講希望另工這个北流結束了後，閣有機會予陳君玉貢獻愈濟物件，予逐家知影。」
其中也有學者對日本民俗博物館，共三條毋捌公開過的歌曲轉錄轉來臺灣，包括第一位女高音林氏好，也有純純、鄧雨賢唱的歌。特展嘛專工再現日本時代通食咖啡、聽音樂的食茶店，予民眾毋但通看展覽了解臺灣流行音樂發展史、也通體驗當時烏狗兄、烏貓姊的生活。
記者 呂尚儒 林郁凱 臺北報導