今仔日（5/23）早起，高雄前鎮發生一件濟歲人駛車的交通意外。一个78歲的查埔人駛車佮計程車相挵了後，閣挵入去人家厝，造成1人著傷。駕駛無食酒，警方當咧調查事件原因。最近濟歲人駛車的議題引起討論，高雄市府是推出抽獎，鼓勵滿75歲的老大人，去共駕照註銷。（新聞標題、導言及內文皆為台語文）
監視器翕著，57歲姓莊的ùn-tsiàng駛計程車來到路口準備欲正斡，毋過78歲姓張查埔人駛的烏色轎車都按呢直直挵過來，相挵了後，這台烏色的車毋但無擋落來，閣挵入去邊仔的人家厝，造成73歲姓白的查某人摖傷。警方講，兩台車的駕駛攏無受傷、嘛無食酒，意外發生的原因閣需要理清，其中計程車ùn-tsiàng表示，烏車駕駛可能是共油門當做擋仔踏。
夆挵計程車駕駛：「挵入去了後猶閣咧踏油門，我趕緊叫伊切熄。」
肇事老大人家屬：「來到遮，伊看著車的時陣，我明顯感覺著，伊家己驚著矣，伊就毋知欲按怎處理矣。」
姓張的駕駛的家屬表示，伊無高血壓嘛無羊眩，駕照嘛是拄換無偌久，平常時駛車攏正常，這擺可能是因為雄雄看著車緊張、袂赴反應，才會挵起去。這幾日因為三峽的事件，也予濟歲人敢有適合駛車的議題，引起關注。高雄市交通局，這馬推出繳銷駕照換抽獎的活動，鼓勵75歲以上的序大，將駕照繳銷，出門換坐大眾交通工具。交通局表示，民眾只要共這張自願註銷的切結書寫好，佮駕照做伙寄去監理所，完成註銷程序，都會當參加抽獎。
高雄市交通局副局長 劉建邦：「對這陣開始到114年7月31為止，年歲滿75以上的序大，只要完成共駕照繳轉來，就會當得著一百箍的商品卡，閣有機會抽著價值新臺票一千六百箍的上大獎──臺灣鐵路周遊券 TR PASS五日票。」
交通局表示，人若有歲，目睭、耳孔攏會退化，反應嘛變慢，這攏會影響著駛車的判斷，怹向望透過抽獎活動，會當提升濟歲人繳銷駕照的意願。
記者 許嘉茹 邱紹揚 高雄報導