臺南市政府佇河樂廣場打造「愛情下願池」，佈置超過10萬粒粉紅仔色的球，唌真濟人來翕相、下願。毋過有民眾嫌講這若像金寶螺的卵，嘛有人質疑塑膠球無蓋環保，甚至網路閣有人傳講活動會提早結束。觀旅局出面回應，尊重多元意見，嘛強調活動到六月底。
上萬粒粉紅仔色細粒球佇河樂廣場，邊仔閣有玫瑰花做妝娗，這是臺南市觀旅局打造的「愛情下願池」。雖然5/21拄仔好暫時歇睏無開放，毋過猶原真濟人來遮行踏翕相做紀念。若池內的塑膠球這陣引起討論，有人講看起來若像金寶螺的卵，嘛有講真有浪漫氣氛，甚至有人佇網路風聲，活動雄雄提早佇五月底就結束，觀旅局出面掰會，會到六月底。
臺南市觀旅局簡任技正—唐呈瑞表示：「下願球由27家業者提供，活動獎項由38家業者贊助，5/17到6/30期間營造浪漫氣氛。」
現場嘛設有食錢檯仔，內面有一粒愛心球通予人寫願望，嘛有觀光票券，為著帶動觀光，這回市府聯合在地觀光產業協會辦活動。不而過，有文化界是建議，臺南成做文化古都，若佇觀光活動內加入在地文化元素，毋但會當增加深度，嘛通成做全臺觀光文化兼顧的示範。
聚珍臺灣總監—王子碩就表示：「遮較早是運河，臺南端市區遮的碼頭，這个所在有足濟故事會當去講，原來這條運河一百冬矣，無共把握牢咧，我感覺真可惜。」杏源珈琲導覽老師—林荃荃也表示：「應該是愛佮臺南在地文化有閣較接近的會較好，像講會使用月老的故事來引入、抑是對七娘媽這个文化，過去的查某囡仔若是欲求愛情，嘛是會去揣七娘媽。」
針對外界關心塑膠球敢會無環保，觀旅局回應，活動結束了後，會由協辦單位優先提轉去做利用，嘛會開放民間申請，提轉做教具，in嘛講尊重多元的意見，未來會持續調整，予活動閣較完善。