衛福部辦活動 希望囡仔了解家庭分工重要性

大部份的囡仔攏看著厝裡的工課攏是媽媽咧做較濟，為著欲予囡仔了解家庭分工的重要性，衛福部佇母親節這工舉辦親子活動，透過扮公伙仔予囡仔了解摒掃的辛苦，教囡仔講摒掃毋是媽媽一个人的代誌。

根據衛福部上新的統計，臺灣女性逐日照顧囡仔、處理厝內大細項代誌的時間是4.4點鐘，比男性的1.48點鐘加欲3倍。衛福部指出，現代社會女性雖然已經較無受著傳統觀念束縛，毋過摒掃、顧囝的重擔猶是佇女性身上，就算是雙薪家庭嘛仝款。

衛福部也表示，這馬各地方政府攏有辦臨時托育服務，家長若臨時有代誌，會當放心共囡仔送去予托育資源中心顧。目前全臺灣攏總有220个托育資源中心，希望提供閣較友善的生養環境，避免現代女性一肩擔雞雙頭啼。