黃酸雨鋒面沓沓仔接近臺灣北部，氣象署提醒民眾，天氣會開始變無穩定，尤其對拜六、禮拜（5/10─5/11）開始，因為鋒面入來，全臺灣攏會落雨，嘛有可能會摔大水雨抑是雷公雨，民眾著愛注意。另外，禮拜因為吹東北風，高溫會比這幾日閣較降10度，天氣愛到後禮拜二（13）才會較穩定。（新聞標題、導言及內文皆為台語文）
五月的第二个禮拜日，5/11就是母親節，可能濟濟民眾有拍算欲出門行踏，毋過氣象署提醒講，因為受著黃酸雨鋒面的影響，各地對拜五暗開始反天，鋒面接近臺灣北部的海面，到拜六、禮拜鋒面入來，全臺灣的雨水真厚，嘛著愛注意短延時的大水雨。
氣象署預報員 陳姵安：「咧明仔載（5/10）鋒面影響，全臺灣各地攏會是落雨較明顯的狀況，尤其是會有局部的大水雨發生，各地嘛攏會是gâu有大水雨發生的情形；而且咧對流較旺的時，阮無排除會霆雷公佮強陣風，尤其到5/11鋒面猶是咧繼續影響臺灣。」
氣象署表示，水氣愛到後禮拜二才會減少，主要是山區過晝較會落雨。另外，咧氣溫的部份，拜六因為鋒面落南，臺灣受著北爿高壓的影響，會吹東北風，所以各地也會反冷。若以拜五各地高溫30幾度來講，到拜六拍算會降10度。
氣象署預報員 陳姵安：「鋒面徙到南爿以後，臺灣附近是轉做偏東北風為主，所以中部以北、宜蘭、花蓮，攏會是有明顯反冷的天氣型態。到5/11，高溫咧中部以北、宜蘭、花蓮，可能是干焦22-24度；南部地區可能到26度左右爾爾。」
氣象署嘛提醒講，禮拜透早的時陣會較涼冷，親像北部和宜蘭、花蓮，低溫大約19-20度，中部21度，民眾著愛隨時注意天氣疊衫。
記者 呂尚儒 林郁凱 臺北報導