車門玻璃雄雄落去險搩著人 高捷：會全面檢修

發生意外的高雄捷運車廂，轉去維修廠，大門玻璃落無去的所在，已經用貼布先貼起來，初八早起七點外，紅線這台列車，對高雄車頭站開出站無偌久，車門的一塊玻璃都規片落落來、飛出去，佳哉無造成人員受傷，高捷接著通報，趕緊派站長上車了解，嘛佇生態園區站安排250位的民眾坐後一幫車。袂少民眾看著這車門玻璃飛去的畫面攏感覺，實在是傷譀啊。

國外旅客：「佇香港從來毋捌發生過，從來毋捌聽過。（看著這个畫面敢會感覺）有淡薄仔譀，若是佇列車行駛的時陣發生的，是足危險矣。」

民眾：「足危險、足恐怖矣，而且細漢囡仔若佇邊仔，可能會去予掔著。」

通車17年的高捷，頭改發生車門玻璃飛去的意外，毋但民眾感覺譀古，都連高捷也想無是按怎發生的。高捷表示，目前是排除人為佮外力的因素，初步研判，可能是固定玻璃的塑膠皮仔老化造成的，毋過因為車門玻璃是永久固定式的，毋是消磨品，怹也有向原廠反應，原廠也講，目前國外猶毋捌發生這款情形。

高捷公司公共事務處長 王柏雁：「阮下暗會針對這陣全線所有的列車，來做全面的檢修。目前廠內的列車攏已經完成檢查，這陣廠內的列車攏無發現仝款的情形，按算下暗會完成所有車隊的檢修。」

高捷表示，每一台車逐工發車進前攏會先做檢查，親像玻璃落去的這台車，所有的檢查攏正常，抑若因為愛閣等原廠排時間、派人來檢查，這馬會先共規片車門拆落來、保全狀況，換一片新的車門鬥起去，予列車先正常載客。

記者 許嘉茹 邱紹揚 高雄報導