無仝語言、無仝年齡層的族群攏有為家己發聲的權利，這幾年來客委會鼓勵客家青年投入國際交流，佇4/14也正式成立「客家青年諮詢委員會」，除了鼓勵客語青年參與公共事務，重視青年的聲音，也希望營造客語生活化的環境。看著其他國家語言有遮爾有制度化的單位佮政策來投入母語復振，台語政策推動聯盟表示，希望中央政府通趕緊成立台語的專責單位，投入資源、有制度化深入各地方，營造台語環境。（此則新聞標題、內文為臺語文。）
規陣客家青年掛繡有油桐花的ne-kut-tái穿正式的siat-tsuh去到國外交流，客委會自106年就開始注心鼓勵客家青年去到國際交流、擴大青年視野，4/14客委會也正式成立「客家青年諮詢委員會」，客委會表示，鼓勵青年用母語參與公共政策毋但是生活化的一種，也會加深青年用母語來思考家己要意的議題，予青年的聲音愈湠愈闊。
客委會副主委邱星崴講：「我感覺重點是代誌有解決，而且是佇咱的語言思考之下來解決，語言是一个工具，毋過語言嘛是熟似自我文化一个重要的媒介，所以是透過客語咱閣較周全，佇文化的概念之下來完成這寡代誌。」
過去也有台語的青年用台語推廣地方文化、參加傳統藝術比賽、活動，毋過欲像客家或者是原住民族群有制度化的專責單位、來投入母語復振、文化保存，對台語來講猶有真長一段路愛行，台語政策推動聯盟表示，根據內政部統計，目前有大約8成的人是聽有台語，台語佇臺灣是迒族群的共通語，目前煞無像其他的國家語言、有專責單位制訂政策來執行，按呢未來恐驚會愈來愈弱勢。
台語政策推動聯盟召集人許慧盈講：「台語佮客語、原住民語，其實伊的這个程度是無仝款的，講的人口數，猶閣有這个使用的範圍攏是無仝款的。咱佇遮閣一擺要求政府會當重視這个問題，予台語會當緊共伊搝起來，這是唯一咱這所有本土語言內底，唯一猶閣有氣力會當佮這个，這馬咱所講的華語 ，會當比並的一个語言。」
台語政策推動聯盟表示，希望有專責單位來負責台語閣有傳統藝文的推廣和保存，有中央單位才通較有制度化深入到各地方營造台語環境，有好的環境嘛才通予逐家知影，台語是會使討論萬項代，為家己發聲的重要語言。