佇金門金湖瓊林村姓蔡的家族仔，當初因為歷史的因素，攏總有三座祖墓夆規畫入去軍事禁區。所以逐年的清明，後代囝孫攏愛向軍方申請，才會當入去禁區祭拜。今年有500个囝孫佇今仔日（4/3）去培墓，拜煞了後，就做伙共這寡祭祖的菜色食食咧，號做「食頭」，這也是金門地區清明祭祖一項特色。（新聞標題、導言及內文皆為台語文）
「焚香、上香。」
超過500个的宗親，來到普通時仔無法度入來的軍事禁區，來遮培墓共祖先祭拜。金門瓊林蔡氏的祖墓，因為歷史原因，予人畫入去軍事禁區，所以逐冬的清明，攏愛提早向軍方申請，才會當入來祭拜。
金門縣瓊林里長 蔡懷芝：「軍方這爿嘛非常配合，不管是衛哨抑是規个環境的整理，怹攏有做，有鬥相共，協助阮蔡氏鄉親，佇來培墓進前，有先做整理。」
瓊林蔡氏的祖墓會佇軍事營區內底，是因為當年國民政府撤退來臺灣，佇金門畫軍事區，蔡氏有三座的祖墓予人畫入去金防部太武山管制區內，才會出現入去軍事禁區培墓的傳統。蔡家的囝孫講，祖先拜煞怹閣會佇營區內底「食頭」，就是逐家做伙坐佇塗跤，食拜好的牲醴、果子等等，這也是金門清明祭祖的一大特色，毋過最近這幾年已經改做佇營區內底食辦桌。
國立金門大學建築系副教授 曾逸仁：「培墓了，怹會舉辦食頭。較早是坐佇塗跤，後來佇邊仔，前幾年開始協助蔡家，佇遐食頭，就是辦桌的方式。」
學者表示，金門是一个宗親族感情凝聚力真強的所在，食頭是金門的傳統也是宗親聯絡感情的餐會，流傳到今閣繼續維持，祭祖食頭也展現出金門人數念先人、食果子拜樹頭、食米飯拜田頭的精神。
記者 鄭亞宣 謝季潾 金門綜合報導