潮州鐵路橋跤的自行車道 捷有機車違規騎來
發布時間：
更新時間：
屏東的麟洛往潮州的鐵路高架橋跤，有全國第一條的鐵馬國道。毋過這條路，不時就有機車傱入來，對民眾造成威脅。潮州分局表示，對1月到今，有8件違規罰款，也會加強臨檢。（新聞標題、導言及內文皆為台語文）
oo-tóo-bái對遠遠的彼頭騎過來，看起來真四常的代誌，毋閣看著路口這塊牌仔你就知影，按呢是違規矣，遮是潮州市區鐵路高架橋跤的自行車道，汽機車攏袂當入來。有民眾表示，因為附近有真濟徛家，逐家貪方便，尤其上下班的時間，上捷看著違規亂象。
民眾：「當然是盡量莫入來啦。有的人嘛是蹛佇這爿邊仔，抑是講蹛佇彼爿，怹就是認為按呢較方便一寡仔。」
民眾：「行路的人較濟。（鐵馬騎入來的人敢有濟？）鐵馬少啦，鐵馬騎入來的比oo-tóo-bái較少。」
民眾：「阮看著oo-tóo-bái阮會閃啦。（會感覺危險無？）有啦，危險啦。因為oo-tóo-bái 伊咧騎較緊啊，阮咧行是慢慢仔。伊若速度（傷緊）阮袂赴閃，就驚會拄著（危險）。
國道三號橋跤，對屏東九如一直到林邊的道路，是全國第一條的鐵馬國道，雖罔潮州市區內底的這段只是一般的自行車道，毋過仝款禁止汽機車進入，因為有民眾反映，毋管是來遮騎鐵馬抑是散步運動，不時搪著oo-tóo-bái，人愛閃車實在誠危險。潮州分局表示，怹一直攏有加強取締。
屏東縣潮州分局巡官 林鉦軒：「113年度本分局已經針對違規駕駛，駛入火車路跤鐵馬專用道的機車取締22件；未來嘛會不定期佇民眾捷運動的時段加強取締，確保專用道的使用安全。」
分局表示，進前有加強宣導，今年到目前為止已經開出八張罰單，依法上懸會當罰1800箍，未來怹嘛會增加臨時取締的勤務。
記者 許嘉茹 邱紹揚 屏東報導
唐嘉良/編輯
