彰化大衛雕像幌甲規尊倒落去 斷做幾若節

半暝天色烏趖趖，國家警報雄雄霆，大衛雕像就按呢倒去，實際來到現場，規个雕像碎糊糊，這座大衛雕像佇彰化市一棟社區大樓前，是34年前建商對意大利買轉來的，因為造型前衛，捌引起濟濟討論，是當地真出名的地標，這遍袂勘得嘉義大地動的威力，就按呢倒落去。

住戶楊小姐講:「看(雕像)已經看30外年囉，真正足毋甘，經過足濟改(地動)，921地動嘛無代誌，就昨暗(雕像)斷去囉。」

彰化市龍山里社區發展協會理事長林基生表示：「佇遮成長的人攏知影這尊大衛雕像，是意大利白石雕刻的，佇30幾年前，等於是咱彰化市上大的地標，但是昨昏經過這个地動了後，發生不幸的代誌。」

看著雕像身軀斷甲離離，住戶也攏真毋甘，提手機仔出來、翕相紀念；抑若地動發生的時陣，彰化縣有三間國中當咧臺南楠西舉辦童軍營活動，當當時學校趕緊安排學生囡仔佇戶外搭thiàn-tòo過暝，營隊活動嘛取消，提早轉來彰化。

學生講：「我感覺有淡薄仔恐怖，尤其彼時陣佇山頂，(地動)搖甲足大的。」、「邊仔的門攏咧振動，樓頂的人攏驚甲吱吱叫，我就愈緊張按呢。」

彰安國中校長曹建文表示：「阮出動所有的老師佮工作人員，替兩百外个學生搭thiàn-tòo，佳哉，規暝落來雖然有較寒，但是學生仔攏平安。」

學生仔因為嘉義大地動著生驚，嘛感受著大自然的威力，佳哉是無人著傷。氣象署表示，三工內可能猶會有規模五以上的地動尾，請民眾愛提懸警覺。