用母語教煮食 青年寫「就愛這味」台文食譜

「好，所以咱這陣咧，先共這蕹菜切切咧。」

共規把蕹菜提出來，切做幾若份。

「好，咱共胡椒粉，共糝一屑仔，閣來豆油。」

共碗公內底的牛肉絲，豉一咧，就會當準備來炒菜，

「好，糝一屑仔鹽。」

炒好夾到盤仔內底，排予好勢，真好食款的沙茶蕹菜牛肉就完成矣。臺語媒體人曾偉旻，出版市面上頭一本全臺語文寫的食譜，用母語來教人煮食。

《就愛這味》作者曾偉旻：「華語書寫，無法度完全來去做呈現的時陣，臺語顛倒會當幫助，咱講每一个動作，攏無仝款，咱過去有講熥物件、煠物件，你華語攏是”川燙”，但是你若是熥物件、煠物件，彼个入水的時間是完全無仝款的。」

曾偉旻講，出這本臺文食譜，除了是伊數念家鄉南投的味，也是希望透過這本冊，予逐家用閣較生活化的方式，接觸臺語文。負責出版的前衛出版社也希望，予逐家用母語熟似食食文化。

前衛出版社主編鄭清鴻：「你連去菜市仔買菜，可能攏毋知彼个菜叫啥物名，著無。而且臺語嘛有誠濟，佇咱的食食的文化內底，臺語真正是一个誠重要的表現。」

曾偉旻講，這本冊毋但用臺文書寫，內底也𤆬讀者認捌客家族群、原住民族群的食食，希望透過這款多元族群的展現，予逐家趣味熟似各款族群的料理文化。