台北燈節2/2起鼓 先公開蛇年主燈「福蛇豆豆」
發布時間：
更新時間：
連鞭欲過年，2025台北燈節的主燈「福蛇豆豆」，佇今仔日（初2）對外公開，是以蛇的外型，結合臺北西門地區的各種文化元素來設計。對1/24開始，台北燈節的部份燈區會先點燈，2/2才正式起鼓。（新聞標題、導言及內文皆為臺語文）
共箱仔拍開，這隻蛇造型的花燈模型，這是今年2025台北燈節的主燈，色水誠影目，頂頭閣有各種西門地區元素的圖樣。今年台北燈節頭擺欲共主燈，對捷運西門站附近，徙到臺北市中山堂，燈區嘛會較大，對捷運北門站、西門站、到西本願寺這搭攏是。
2025台北燈節主燈圖樣設計者 祈孟含：「會當看著這个歷史真久的紅樓，然後閣有象徵臺北的北門，然後閣有少年人特別佮意的，音樂的元素。用這款有圖案皂壁的藝術，去結合咱古今中外的元素，予咱的歷史古蹟，嘛通有少年的色彩。」
但是這幾年民眾環保意識攑頭，淨零碳排嘛是政府重要的施政目標，往過燈會製造的花燈、抑是送予民眾的鼓仔燈，大量增加塑膠糞埽佮電池回收的問題，引起環保的爭議。臺北市觀傳局回應講，怹有改變花燈的材質，予遮的材料通閣再利用、嘛較耐用，達成永續的目標。
臺北市觀傳局長 王秋冬：「阮對舊年開始，有真濟材料攏是用租的方式，所以伊會當重複使用，用按呢來避免，一改性的使用材料。」
2025台北燈節策展人 劉治良：「按怎予伊的材質閣較耐用，會當利用的年限閣較長閣較強，毋是用一擺就干焦會當擲掉造成汙染。顛倒是咧莫擲掉的狀況，按怎用幾若年、用幾若擺。」
2025台北燈節1月24，部份燈區會先點燈，迎接新正；抑若正式起鼓的時間是2/2。策展人嘛表示，未來有按算欲鼓勵各里長、區公所，予這寡花燈佇咧燈節結束了後，通繼續咧無仝所在展出，延續觀賞價值。
記者 郭柏均 林郁凱 臺北報導
唐嘉良/編輯
