和平新生天橋勘查 安排審議敢欲報文化資產

台北市文化局、勘查準備欲拆掉的「和平新生天橋」，也討論敢欲提報做文化資產。現場民眾、意見無相siāng，有人講天橋文化有伊的歷史價值、應該愛保存落來；也有人認為，這天橋舊閣漚，上好是規座拆掉。

台北市和平新生天橋、拆除作業，引起民眾有無仝意見，雙方人馬、提出無仝訴求的布條、字紙，講出家己的心聲。因為拜三，台北市文化局欲進行第一改公開的、現場勘查、佮審查會議，欲審查和平新生天橋，是毋是會當提報做文化資產！反對拆除的民間團體嘛以文化價值、城市記持做理由、希望台北市政府會當共這座天橋、保留落來。

北科大建築系助理教授陳盈棻表示，這座天橋除了阮原本咧講个文化資產，在地的文史風貌記持以外，伊閣有工程美學的部份，予我感覺伊其實是，閣較應該予人保留落來，甚至有閣較濟的討論空間。」

毋過，支持拆除的當地人表示，in攏已經蹛遮蹛40冬矣，對文化保存的講法，並無認同。當地的居民認為，天橋的實用性無懸，這馬無人欲peh懸peh低、有天橋顛倒無方便，嘛無存在的必要。

當地居民，「真正的 我從來毋捌看過有電影來遮翕，一工會當有兩个人過(天橋)，我敢共你保證，長輩無可能起去天橋，像我嘛無法度矣。」

和平新生天橋是毋是欲拆除？民眾有無仝的心聲佮意見。

台北市文化局表示，佇收著民眾的文化資產申請書彼工，就隨請台北市新工處停工。而且佇拜三進前，就有先針對文資法，邀請6位委員進行審查。台北市文化局預估一禮拜過後，會有會勘結果，若有達到文資價值的共識，會趕緊排入大會議程審議。