厚雨水、臺南木瓜產量少 果子、果汁擔綴咧起價

臺南種木瓜的面積，是全國第二。毋過因為今年雨水濟、產量減五成，毋但影響出貨，價數嘛一直起，農民估計，產量愛等到明年二月至三月、才會恢復。


農民透早咧巡木瓜園，欲共有黃勾的木瓜挽落來載去市場交貨，行過來行過去攏總干焦挽五籠爾，農民講，三四月一禮拜平均會使挽七千斤，等於80籠，這陣是減10倍。農民無奈講，今年風颱的雨水濟加上日頭有時傷炎，致使木瓜欉較袂牢花。

木瓜農曾炳坤表示，「木瓜牢花的時陣，這馬就是無花，會就是伊塗跤底，攏傷澹閣傷熱。」

木瓜農王維澤嘛表示，「因為受著前兩个風颱影響，雨水傷濟致使果欉爛去，果子嘛有咧爛，所以這馬的價數就會較懸。」


這陣木瓜大欠貨，價數綴咧起。農民指出，近來交貨的價數一台斤平均60至65箍，是並舊年較懸稍寡仔。這連帶嘛影響中盤，濟濟業者目前只好干焦先做人客吩咐的訂單。若賣果汁的講，為著品質賣一杯木瓜牛奶就愛用一粒，業者袂堪得，這禮拜開始一杯起十箍。

新化果菜市場中盤商業者：「貨主有的講攏剉掉矣，（為啥物？） 袂生、挽無矣，有的較好的牢咧遐嘛袂黃，這馬咧斷層、毋但遮爾，就連屏東遐嘛是，所以這陣阮愛車埔里的。」

果汁店老闆娘張椒淑：「像這 (已經一公斤愛76箍)著，我是這兩工才起價，我強欲袂堪得。」

風颱、雨水若濟，果子的產能加減會影響。種木瓜的農民按算若欲恢復產量，就愛等到明年二月至三月才會沓沓仔平穩。