屏東西市場開2億整修 營運4個月今煏解約潮
發布時間：
更新時間：
開2億重新整修的屏東西市場，今年七月才開幕，成做屏東頭一个有冷氣的五星級市場，毋過營運四個月，遊客反映市場油煙味重，攤商嘛講人客愈來愈少，這個月已經有三个業者欲解約，無欲閣租矣。（新聞標題、導言及內文皆為臺語文）
開2億重新整修的屏東西市場，今年七月才開幕，成做屏東頭一个有冷氣的五星級市場，毋過營運四個月，遊客反映市場油煙味重，攤商嘛講人客愈來愈少，這個月已經有三个業者欲解約，無欲閣租矣。
屏東西市場倚晝時陣，有北部的觀光團來參觀，攤商攏拍拚推銷家己的商品，毋過無十分鐘，遊客煞攏無看見人影，實際來到二樓內用區，現場嘛無超過10个人，到底民眾對這个予號做五星級市場有啥物看法。
民眾羅先生表示，「做生的、做熟的，可能無希望佇隔壁就看會著，衛生上會有一點仔考量。」
民眾林先生嘛講，「拄入來的時攏有一寡氣味，可能食的、賣生的、閣有一寡物件，佇冷氣內面可能一寡味較會牢佇衫。」
當初時西市場是開兩億外改建，七月營運了後，有民眾認為擔仔位的規劃無好勢，有抽油煙機煞無裝管路，致使油煙四散到邊仔賣衫的擔仔位，賣衫的頭家娘嘛表示，伊不止仔後悔來遮做生理。
服裝店頭家娘表示，「阮的衫頂懸嘛會加減沐一寡油煙，甚至有人客來鼻我的衫，講敢有油煙味。」
烏輪攤頭家講，「業績差欲一半以上，因為外口攏無人，毋是干焦報導三攤退出，是超過、空攤嘛蓋濟，嘛毋知為按怎攏無愛處理。」
攤商表示，真濟頭家因為生理䆀，甘願下晡才開店甚至無欲做矣，屏東縣議員也佇議會質詢城鄉發展處長，處長干焦強調已經有裝排油煙的設備。
佇議會中，屏東縣議員陳揚提問：「環保局這爿看著這个，無通風管的排油排煙設施，你感覺敢有及格。」
環保局長顏幸苑回應：「所以我才講我欲來建議城鄉處，敢會使予阮入去輔導。」
環保局長表示，西市場的油煙問題確實愛改善，嘛建議市場管理單位接受輔導，予攤商佮民眾一个四序的環境。
記者邱紹揚 高雄報導
