康芮透強風 北門、將軍沿海芳瓜農民損失嚴重
發布時間：
更新時間：
這回康芮風颱，佇臺南也造成損害。像北門、將軍沿海種洋香瓜，布棚設備攏總予風搧歹去；另外，安南、安平沿海的蚵棚攏予風搧到海岸頂。漁民表示，漁會捌共漁業署爭取講，共蚵棚囥入漁港內，漁業署無同意，才會變甲按呢生；抑若漁業署是回應講，考量安全性，才來拒絕。（新聞標題、導言及內文皆為臺語文）
洋芳瓜農民今仔種栽仔落去，園內白布棚予風颱規个搧甲糜糜卯卯，嘛有閣一禮拜準備通收成的農民予thún踏甲損失慘重。這回北門、將軍沿海測著10級以上的強陣風，致使濟濟農民的器具攏害去，農民無奈講，山陀兒舞一改矣，這回仝款閣走閃袂去，予in欲哭無目屎。
受災農民：「攏已經䆀去矣啦，（瓜欉）攏拍甲無去矣。你共看，內面的栽仔攏拍甲挐氅氅，因為彼鐵仔攏抨去所以逐區攏按呢。」
受災農民：「彼回南風足恐怖，原本早起無倒的布棚仔、設備、鐵仔攏拗拗斷。這風若剾落葉仔會蔫去，你若布棚去予剾去瓜仔籐嘛剾斷去。」
養殖漁業仝款嘛受影響，安平漁光島的岸頂有大量的廢竹仔，全攏是予風湧吹歹去的蚵棚。風颱期間，本來漁會有向漁業署爭取，向望通予蚵棚入安平漁港閃風雨，煞因為考量安全性予漁業署拒絕。漁民質疑，當時就發布海上警報，船隻根本無法出入，哪有這款疑慮。
受災蚵農：「你袂欲拖入港蚵棚共囥佇外海，造成蚵農足大的損失。第二點就是造成海岸線的廢竹仔規大堆，整理起來愛閣開真濟錢。你看這馬現場規片足亂，我想漁業署的長官真正愛負責任，好好仔檢討。」
臺南市漁港及近海管理所長 張順得：「漁業署表示因為阮的漁港，是佇漁船的停泊參航行的安全使用，所以in才無同意蚵棚入來漁港。」
風颱掃來，濟濟人的心血攏烏有去。洋芳瓜是連紲兩冬是收成攏真䆀，抑若蚵棚農民講上少損失兩百萬，順利搶救轉來的的蚵仔賣相嘛真䆀，這予看天食飯的農漁民實在真無奈。
記者 李晨宇 臺南採訪報導
唐嘉良/編輯
823公投》重啟核三，你怎麼看？
