搬過真濟電視劇 資深演員石英食到82歲過身

台灣資深演員——石英，傳出過身的消息。in囝透過經紀公司表示，石英佇10/27下晡3點45分，佇台大病院過身，食到82歲。石英佇前幾年，有受著歌仔戲演員唐美雲的邀請，搬歌仔戲的電視劇《孟婆客棧》。唐美雲講，石英是一个值得學習的先輩，拍戲頂真、而且真照顧後輩，認真的態度值得尊敬。

佇歌仔戲電視劇《孟婆客棧》演出，這是台灣資深演員石英佇電視頂最後搬演的作品。拜三（10/30）傳出石英因為年歲大過身的消息，伊的囝林千鈺、林義山也透過經紀公司，證實10/27下晡3點45分，石英佇台大癌醫中心過身，食到82歲。石英2001年捌因為肝炎昏迷，後來後生緊急捐肝才救回一命，恢復健康了後，捌佇記者會講家己的經驗、也捌參加活動分享按怎保護肝的健康。

這幾年石英真少演出，毋過歌仔戲演員唐美雲咧拍《孟婆客棧》的時，有邀請伊來客串，伊也隨答應來表達對唐美雲的支持。唐美雲表示：「伊對著戲、猶閣有提攜後輩，伊完全是非常的用心，阮會擔心講因為戲毋通傷重，抑是講伊會傷辛苦，所以會盡量安排，但是伊真正有夠好，伊真正是值得阮敬佩的一个前輩，伊就講『無要緊』、就橫直照拍戲的進度佮工作的流程。」

石英本名林忠平，1966年參加電影公司演員考試出道，搬過連續劇、電影、廣告，有真濟攏是用台語來搬，會當講是佇台灣通人知的資深演員。唐美雲講，石英是一个值得學習的先輩，拍戲頂真、而且真照顧後輩、牽教少年演員，對台語戲劇的發展真有貢獻，也有真重要的地位。