國家語言發展會議，分區論壇攏總11場，包括台語、客語、手語等等，攏已經結束。今正式大會佇咧這禮拜六、禮拜舉辦，收集進前論壇的各種意見，欲來綜合討論自語發法施行以來，國家語言的發展狀況。（此則新聞標題、導言、內文皆為臺語文。）
為著欲予台語、客語等等的國家語言，通復振、發展，文化部主辦的國家語言發展會議，11場的分區論壇已經攏結束，閣來10/26、27欲佇屏東召開正式大會。台語路協會呼籲文化部，語言欲復振，除了愛培養語言意識，嘛著有環境佮友伴。
台灣台語路協會理事長董力玄講：「已經有足濟台語家庭，用家己的力量晟養一陣台語囡仔出來，但是遮的囡仔入去學校了後，in顛倒無法度受著應該愛受著的母語教育，因為客語、原住民攏有，但是到這馬攏猶閣無以台語為主體的學校。」
另外，行政院會6月有通過文化部「國家語言研究發展中心設置條例」草案，欲用來負責國家語言整體的研究、保存和政策建議等等，有學者指出，若照政府的用意，台語的相關事務，猶原會繼續分散咧文化部各部門，猶是無一个專責的行政單位。
成功大學台文系教授陳麗君講：「伊(語發中心)是以語言調查，伊是培育人才，伊是做語料庫，目前看起來猶是真欠台語文的委員會。會使期待就是講，毋是對草根來做，若是國家會使來成立這款的單位，至少這三个單位，伊是每一个單位攏有的時陣，較有法度講咱合齊來做啥物工課。」
台語路協會和成大學者陳麗君攏呼籲政府，一个語言欲復振、欲發展，長期來講有真濟代誌愛做，希望會當像客委會、原民會，成立復振台語的平行部會，ﰀ嘛向望講咧語發會議頂的濟濟建議，攏通成做未來政策的參考。