彰化比賽啥人上gâu食炕肉飯 醫生：恐驚胃破空

逐家一喙接一喙，認真扒飯，這是彰化縣10/12舉辦的炕肉飯gâu食比賽，看啥人會當上緊佇八分鐘內食五碗炕肉飯，現場也有分免錢的炕肉飯，活動唌袂少人參加。但是就有醫師指出，gâu食比賽對健康有敗壞，縣府無應該歹𤆬頭。

員林基督教醫院協同院長陳守棟講：「較無健康啦，若欲好消化應該愛沓沓仔食，予咱的喙瀾佮食物混合，按呢較好消化，一睏仔食五碗，量實在是傷濟，對咱的健康來講是較無好。」

醫師指出一般人胃的容積，是1.2至1.5公升，若是傷過脹、上嚴重的話可能會胃破空、胃出血，但是嘛有民眾認為，活動誠趣味，參加的人家己愛評估身體狀況，縣府表示，比賽彼一日攏有醫療團隊佇現場、掌握狀況。

民眾認為：「袂䆀矣！免錢的飯好食。」、「好耍就好啦，我感覺參加這个活動莫拚名次，就是來參加彰化辦的活動，唌民眾來彰化𨑨迌。」

彰化縣政府城觀處長王瑩琦講：「這擺的炕肉飯gâu食活動，主要是用活潑的方式來行銷彰化的炕肉飯，所以是用趣味比賽的方式進行，現場有安排醫護人員待命，嘛有保險，以防萬一。」

縣府強調，活動事先攏有提醒民眾愛撙節，安全第一，逐家對gâu食比賽的意見，in攏有聽著，未來若辦活動，會納入各界的意見、詳細思考舉辦的模式。