彰化赤水公園附近 大雨造成水崩山影響通車
發布時間：
更新時間：
彰化的田中中南路一段，赤水公園附近有山崎崩落來，影響著交通。另外佇大城，因為濁水溪漲起來，公所先共六个庄頭做預防性撤離，國軍出動60人，協助大概4千位村民先徙去附近的國校仔。（此則新聞標題、導言、內文皆為臺語文。）
溪水掣流，畫面真驚人，因為凱米風颱帶來的大水雨，濁水溪水尾的自強大橋，早起達到二級警戒，溪水淹過駁岸，加上這陣是大流，大城鄉公所請國軍出動協助，撤離沿岸的六个庄頭，大約四千外位村民。
彰化縣後備指揮部指揮官上校梅晉學，「支援12台中型戰術輪車，以及60人的兵力，來投入人員的疏散。」
彰化縣長王惠美，「沿岸的這幾个庄頭，有二樓的就近（避難），若無二樓的就疏散到西港佮大城國校仔。」
風颱雨也造成佇彰化田中鎮中南路一段，赤水公園附近發生山崎水崩山，一時影響雙線通車，目前已經排除障礙，另外佇鹿港、埔鹽鄉也有濟濟路樹倒去，公所、工程人員接著通報、隨趕來處理，社頭鄉甚至有一欉百年的榕仔樹，嘛袂堪得風颱的威力，規欉倒去。
民眾，「風颱來，就按呢倒去（記者：會毋甘無）會喔毋甘啊！」
民眾，「這百外年囉！做田的，中晝時攏嘛佇遮坐涼。」
佳哉這幾層意外，攏無造成人員傷亡，中央氣象署表示，凱米風颱的強度雖然有減弱，但是風颱的外圍環流佮西南水氣，繼續影響臺灣，中南部山區、苗栗以南的平地，猶是愛注意會有大水雨的發生。
洪家馨/編輯
