民團設計「老人奧運」 150位序大妝做選手比賽
發布時間：
更新時間：
為著欲鼓勵老大人會當有運動的慣勢，會當佇運動當中揣著趣味，華山基金會用奧運做主題，毋但替150位老大人妝娗做世界各國的運動員，閣設計趣味的比賽，希望老大人透過人佮人之間的互動，予身體佮心理會當閣較健康。（此則新聞標題、導言、內文皆為臺語文。）
百外位老大人，打扮做無仝國家的運動員，一隊接一隊入場。華山基金會25這工，邀請IN佇嘉義縣市服務的長輩，做伙來參加這場，專工替長輩舉辦的運動會。
華山基金會嘉義縣站長楊光鈺，「趁這个機會，會使用，佮逐家互動的這个的機會，會使予in做一个運動，做一个較趣味的互動，予in感覺講有人陪伴的感覺。」
除了予老大人做無仝的妝娗以外，閣有跤球、棒球佮桌球的比賽，華山基金會講，透過簡單的踢、擲、閣有拍、各種動作與序大練反應，會當順紲觀察老大人身軀筋肉的狀況。
參加長輩王賢明，「逐家就足歡喜，按呢感覺講較好過日。」
參加長輩羅金煉，「佇厝攏毋捌看過誠濟人、誠好耍」
華山基金會表示，嘉義縣市老人濟，IN的序細無一定有法度陪佇身軀邊，透過民間團體舉辦活動，希望營造鬧熱的氣氛，予長輩有人陪。抑若遮的長輩，較濟攏是作穡人，無一定會知影奧運是啥貨，但是這場老人奧運會，IN佇參與的過程當中，笑甲真歡喜，攏真投入也真樂暢。
洪家馨/編輯
