扒龍船、食肉粽 科教館結合科學遊戲過五日節

主持人喊開始，三組家庭提著龍船往前出發，但毋但比速度，參賽者中央愛閣停落來耍遊戲，這是國立科學教育館的五日節活動，主辦單位講遮的遊戲其實攏佮科學原理有關係。

科教館館員王若憶表示：「親像第一關搝雪文泡，其實雪文泡毋是遮簡單會當搝起來，伊佮用歕的無仝，用搝的著愛搝出一定的彎度，伊才有法度予泡走出來，這佮表面張力有關係。」

另外傳說講五日節擲粽入去河內底，是為著保護屈原莫予魚蝦食去，科教館嘛將這个民間傳說，融合科學遊戲，由參加的家庭合作設計裝置，透過科學機關的連鎖反應，予粽落入去IN設計的模型內底，參加的民眾認為按呢的活動是真新奇趣味。

科學機關設計師曾孟涵表示：「這大概會結合，物理電學力學的部份，伊予囡仔做伙自由創作，這个過程中，無一定愛講著真困難的科學原理，但阮透過(予囡仔)觀察，用創意來完成。」

民眾表示：「五日節真歡喜來到科教館，參加五日節的活動，第一改參加按呢的活動，感覺非常新奇趣味，囡仔嘛真期待。」

科教館講，過節有傳統的風俗，將風俗佮科學智識結合做伙，予親子同齊來耍，家庭互相合作，in希望透過科學遊戲予傳統的節日會當更加趣味。