新化百年古井開封 五日節開放民眾取午時水

臺南新化保生大帝廟，廟埕人排甲躼躼長，濟濟民眾提空罐仔等欲貯午時水求一个好彩頭。

民眾林小姐表示：「提十公升的水轉來，轉來因為這會當淨身 身體健康。」

廟方共香爐排成八卦型那唸咒語，等午時一到，欲共一口將近封半世的井重新拍開。其實這口井佇建廟時就有，到今有四百冬歷史，廟方指出，當時因為廟體整修，驚安全問題閣加上水道水普遍化，尾手才共封起來。今年龍年，加上古井嘛佇廟的龍爿，in頭改開放予民眾來使用。

臺南新化保生大帝廟主委林志聰表示：「信眾有咧共阮廟宇建議講，是毋是會使來取午時水袂，阮有共大道公請示伊講會使。」

在地耆老鍾先生表示：「民國50幾年彼陣仔政府講這搭遮的水，有重金屬彼陣開始才無咧使用。」

民間風俗，五日節這工中晝11點到1點，這段時間的水叫午時水，其中嘛流傳袂少相關的俗諺，像講古早人講，午時水洗目睭，金甲若烏鶖；抑是洗午時水，無肥嘛會媠；閣有這句是午時水啉一喙，較好補藥食三年，每一句背後有無仝意涵，時代改變，已經無建議提來啉。

臺南市台語文化班學會理事長黃良成表示：「咱的風俗內底就是講這真有療效，所以才講午時水洗目睭，會當目睭金甲若烏鶖，過去物資欠缺，會當食三頓飽就足無簡單，若閣食甲會肥，所以講午時水等於是上天的恩賜，會當辟邪嘛會使鎮煞。」

五日節有濟濟習俗，若清代時期的台灣人in是按怎過咧？根據清乾隆28年的《臺灣府志》內底記載，五日節除了會提稻稈佇厝四箍圍仔熏，也會佇門斗插艾草，另外嘛會互相送西瓜佮肉粽來慶祝，，透過俗諺佮文獻紀錄，也予逐家知影古早人是按怎過五日節的。