青鳥行動萬人會齊 學界調查了解民眾資訊來源
最近真有爭議的立法院職權行使法修法，佇28三讀通過，前後計共有4改大型的抗議行動。有20外个來自無仝大學的研究生佮學術工作者，主動成立學術調查小組，針對5/21、24兩工的抗議行動，抽樣調查青鳥運動208位參與者，怹是對佗了解社運的資訊。發現15至24歲這沿的少年家，和10年前日頭花學運比起來，以IG佮Threads為主，大約占七成，抑若35至44歲的民眾是以Facebook為主。
政治大學社會學研究所博士生 李俊穎，「這馬15歲到差不多24歲，就是講這馬有咧讀冊的這陣人，阮比較的就是講10年前的學生，就是這馬已經25歲到34歲，閣來就是閣較有年歲的遮的人，比較起來ﰀ用
這馬的少年人用面冊的人較少，但是ﰀ可能有較濟比例咧用，比如講IG抑是Threads。」
這馬當咧讀博士班的李俊穎，是這改研究的主筆之一，伊表示這改青鳥行動，有影有濟濟包車、寄付等等的串聯行動的資訊，攏來自IG佮Threads，怹希望透過這个調查，會當予逐家了解公民接受資訊的習慣佮動員的途徑。
政治大學社會學研究所博士生李俊穎，「學術界嘛是閣有人願意佇現場，做這款的調查，會當予逐家知影講現場的一寡，來參加這改運動的面貌是按怎。」
另外，這改會叫青鳥行動，嘛是因為佇面冊若是寫青島東路，通看著資訊的人就會減少。所以濟濟人攏改寫做青鳥。長期咧做社會觀察的學者劉定綱表示，雖然研究的樣本猶無夠濟，毋過伊對這个研究表示肯定，伊指出社會欲做公民動員管道愈多元愈好，嘛會當避免發生親像面冊阻擋資訊流通的情形發生。
臺師大臺灣語文學系教授劉定綱，「運動的組織者，會當拍拚予你的訊息來源愈多元，因為當伊一个主要來源，有一寡政策調整抑是降低接觸，類似這寡動作的時陣，運動的訊息傳播就會ﰩ牢，所以逐家會當運用，各種新的這種社群方式其實是袂bai。」
劉定綱嘛指出，這改青鳥行動閣有一个真重要的特色，就是去中心化、無社運明星，真濟人分享的文章，可能分佈佇無仝的社群平台，予每一个人攏有發言權，同齊為著公民行動出聲出力，這是這改青鳥行動非常值得肯定的部份。
