麻豆十二婆姐陣頭拚傳承 參學校合作望釘根

一个接一个戴面具的人，身軀穿紅衫，雙手提雨傘佮葵扇，IN當咧拍圈、撚雨傘花踏八卦，這是全台陣頭內真罕看著的十二婆姐，成員由12宮的婆姐佮一个婆姐囝組成的，源頭是咧講陳靖姑保護婦女參紅嬰仔的故事。雖罔婆姐咧表演的動作無真大的變化，毋過這煞有特殊的宗教意義。

民眾，「算囡仔的守護神，對身體抑是生囝這方面的上好啦。」

麻豆南勢保安宮十二婆姐大宮 梁朝草，「做頭前就是欲通共囡仔收驚，收予伊暗時較好睏，毋是干焦囡仔爾 大人嘛會使，麻豆南勢保安宮十二婆姐隊長 李明發，我這馬咧叫這少年仔出來學，無我若無摃就攏失傳去矣。」

麻豆南勢保安宮的十二婆姐對民國10年成立，經過五代的婆姐頭來𤆬領，到今傳承上百冬。本成陣頭成員干焦有查埔的爾，這陣時代改變加上少囝化，驚文化失傳去，致使IN尾手開放查某的嘛通做伙參加。廟方講，無論是陣勢、裝扮等猶是維持傳統袂改變。

麻豆南勢保安宮主委施金木，「查埔的體力較好出來擔任，所以彼時陣就是有出丁出來擔任十二婆姐，到這个民國70年來因為工商社會演變，查埔的攏出外趁食，所以彼陣才來成立查某的來配合。」

麻豆南勢保安宮十二婆姐第七宮王玉蘭，「對我大官伊傳予我的，伊年歲有矣 叫我落去做，我這馬做甲欲三十冬矣。」

十二婆姐是文陣的一種，南瀛五大香科之一麻豆香會使看著。廟方指出，現代少年輩較無興學這，近來in注心參在地學校合作咧推捒，嘛佇廟內打造展示文物的空間，向望珍貴的資產永續流傳。