「願榮光歸香港」變禁歌 蹛臺港人驚擴大限制
發布時間：
更新時間：
佇香港反送中運動期間，創作出來的「願榮光歸香港」，拜三去予香港上訴法院裁定做禁歌，是香港主權交轉予中國了後的頭一條禁歌。佇臺灣的香港人，對這款的結果袂感覺意外，𪜶也煩惱未來佇香港，這款的限制會愈來愈濟，仝款受著獨裁的壓迫。
香港反送中運動的代表性歌曲「願榮光歸香港」，拜三去予香港上訴法院以「成做破壞國家安全的武器」為理由，批准香港政府提出的禁制令，將這條歌裁定做禁歌，這也是1997年香港主權回中國了後、頭一條予人禁的歌。佇臺灣生活的香港青年表示，𪜶對這个結果無講蓋意外，因為往過也有真濟類似這款限制的例，毋管是用法律禁止，抑是恬恬仔禁止，未來干焦會愈來愈濟。
香港邊城青年秘書長，馮詔天表示：「歌曲也毋是單一的案件，因為其實香港政府過去也是可能佇圖書館內底落架，任何的佮中國歹話，抑是佮抗爭相關的冊，可能就袂用直接的方式。所以咱會當看著，其實這款的案例，紲落來會一直發生。」
香港邊城青年是一个由佇台灣生活的香港人所發起的團體，𪜶一直攏真關心香港的狀況，目前這條歌佇香港的網路猶看會著，毋過香港政府當咧予網路平台壓力、要求共提落來。台灣香港協會認為，準講網路平台有影照做，以後無的確也共臺灣、香港、甚至全球，對中國不利的歌曲撤掉，絕對愛阻擋這款代誌發生。
台灣香港協會理事長，桑普表示：「Youtube若配合，今仔配合願榮光歸香港，以後敢會禁止島嶼天光？敢會禁止所有其他臺灣、香港、全世界，遐對中共不利的一寡歌曲？我驚的一个結果是 Google袂共這提掉，毋過會家己起一个網路長城，就予香港的人看袂著，就等於一个升級的獨裁矣。」
台灣香港協會表示，真濟無佇香港的香港人攏一直有咧宣傳這條歌，這馬的禁制令干焦規範香港境內，準講以後政府去立一个域外效力的新法，會變做一件真恐怖的代誌。
劉芯瑀 謝季潾 臺北報導
陳怡臻/編輯
