為了予閣較濟佮意現代劇的觀眾，也會當接觸臺灣的傳統藝術，也予佮意歌仔戲的觀眾，體驗現代劇迷人的所在。明華園總團佮綠光劇團，兩大劇團合作，毋但做伙賣票，也希望觀眾互相交流，看著無仝類型、精彩的戲齣。
舞台雄雄踅爿，對歌仔戲後台變前台；這是歌仔戲團明華園戲劇總團，用歌仔戲結合台灣文學「洪醒夫」作品「散戲」的舞台劇。這馬兩个劇團迒界合作，毋但做伙賣票，也望觀眾互相交流。
明華園戲劇總團出名小生孫翠鳳講:「阮這擺是文學佮現代劇，相拄著的戲中戲、散戲，拄好參咱押解內底的戲，現代劇是真對同，攏是文學迒界。」綠光劇團導演吳念真講:「其實阮兩團的觀眾有時是重疊的，會看歌仔戲的，看綠光的戲，應該無問題，因為綠光的戲內底，其實真濟本土的元素佇內底。」
予佮意歌仔戲的人通認捌舞台劇，也予舞台劇的觀眾有接觸歌仔戲的機會，這兩大劇團也望講，未來會以台灣文學做基礎，創作新的藝術風潮。
明華園戲劇總團出名小生孫翠鳳講:「咱佇散戲內底有講著，會當留落來的，以後就會講伊是傳統，會當生存落來的，就是傳統。」綠光劇團導演吳念真講:「任何表演工作者、表演團體，佇經歷過所有苦難以後，閣會當存在，一定有伊的必然價值。」
兩个劇團也表示，未來會密切合作，明華園演員到綠光搬舞台劇、綠光演員到明華園搬歌仔戲，望予觀眾有新的看戲體驗。