彰化南瑤宮笨港進香 起駕置天台、回程蹽溪洗淨

甲辰年南瑤宮笨港進香，欲佇3月24起駕，展開八工七瞑的進香活動，廟方舉辦置天台儀式，祈求進香平安圓滿

彰化市公所寺廟室主任陳錫明，「今仔日就是辦這个置天台，因為咱佇這个禮拜日，就是新曆的24這一工，早時八點就欲來起駕，這个路程就是講照古例全程行路，逐家攏用行的。」

彰化市公所表示，南瑤宮笨港進香已經有兩百外年的歷史，是臺灣有紀錄以來頭一个進香團，這陣已經成立十个媽會，逐年輪流進香，今年是三媽年，遵照慣例，會蹽溪祈福

南瑤宮笨港進香大總理白鴻森，「古早話有講，大媽愛食雞，二媽出來愛冤家，三媽照古例就是一定蹽溪，經過咱濁水溪無行橋頂，是行溪埔的路轉來咱彰化，所以講這三媽六媽的蹽溪，是上盛大的活動。」

今年的笨港進香，3月24起駕，除了聖三媽、新三媽、老六媽以外，閬將近一百年，開基媽嘛會同齊出發進香，回來路程大約三百公里，會佇29這工，對莿桐蹽過濁水溪轉來彰化，3月31回鑾。