全臺頭一台黃金販賣機 鑢卡就通買金條、白銀
發布時間：
更新時間：
最近國際黃金價數直直起，臺灣金仔店公告的黃金價數，也是這幾年上懸的。佇高雄煞出現全臺灣頭一台黃金販賣機，就tshāi佇百貨公司內，有賣金條、白銀等等商品，毋過算起來，價數猶是比金仔店較貴，引起逐家討論。（此則新聞標題、導言、內文皆為臺語文。）
這台看起來親像一般的販賣機，其實伊是全台頭一个黃金販賣機，操作方式仝款，民眾只要鑢卡，金仔就會對出口落出來，閣有保證書，其實毋但賣金條，也有白銀等超過十个商品，價數對一千到三千外箍攏有，業者表示，才一個月，營業額已經超過五十萬，唌袂少民眾試看覓。
民眾，「金仔店內底限制足濟，限制當時入去，當時欲出門，欲創啥無方便，機器操作揤揤就會使，我感覺較方便，貴一點仔是較無要緊。」
民眾，「買物件，連黃金這種貴金屬，攏會使按呢買。」
黃金販賣機行銷經理莊恩瑜，「到今目前營業額部份，有超過五十萬按呢，是希望消費者，會當買黃金的時陣，莫受限時間抑是地點，攏會當輕鬆購買。｣
雖罔方便，毋過販賣機金仔的價數，確實比金仔店的閣較貴，一公克可能精差800箍。其實最近國際金價已經破兩千箍美金，是這幾冬以來上懸的價數，金仔店業者表示，最近賣金仔的人，加出三成。
金仔店業者，「起有三成左右，因為回收其實，這馬進價真懸，落佇七千九，足濟人客提真濟黃金來拋售。」
進前也有大賣場賣金仔，引起真濟討論，這馬民眾買金仔的通路變濟，煞拄著黃金當咧起價，金仔店業者預估，未來金價有可能會繼續起。
熊楚瑜/編輯
