正統鹿耳門聖母廟迎春牛 芒神示警今年雨水少

廟方人員沓沓仔共五穀寶物佮銅錢囥入牛腹內，咧進行入寶儀式，祈求四季平安。這隻四寸懸、八尺長的春牛，是上千位民眾用四個外月做的。正統鹿耳門聖母廟每冬攏會辦「迎春牛」活動，到今傳承40外冬。詳細看春牛參芒神的色水，逐冬攏是照農民曆節氣落去做。若今年芒神穿鞋兼褲跤攏放落來，廟方講這有象徵氣候較熱的意涵。

正統鹿耳門聖母廟主委王增榮，「今年會較欠雨水、會較熱，所以逐家愛節約用水，恁較看這个春牛神穿鞋仔，褲跤攏放落來，所以今年會較熱。」

傳統工藝糊紙保存者道長吳文進，「今年的春牛，阮共做予伊按呢犁犁咧、咧拍拚，所以逐家愛拍拚、愛認真，按呢國家才會興旺。」

為著推廣這項無形文化資產，廟方這改嘛邀社區參學校來製作創意春牛。除了用大型的柴疊仔落組合，閣有人發揮創意，用米袋仔佮瓜笠仔等物件來替牛做妝娗，In攏總做六隻，初七嘛正式展出。

臺南市瀛海中學學生，「牛的兩爿阮分別用，鹿耳門聖母廟的Q版神像，另外一爿阮展現，瀛海多元文化的發展的特色，牛的下跤嘛代表愈來愈興旺。」

鐵營創意公司總監王俊淵，「其實是一陣藝術家的朋友，做伙來想這个春牛欲按怎製作，欲按怎予囡仔，會當落去佇頂懸去做彩繪妝娗。」

新正年頭連鞭到，廟方按算正月初一欲開放逐家摸春牛求好運。像人咧講，摸牛頭，囝孫會出頭。廟方表示，逐家到時會當對牛頭摸到牛尾，而摸每一个部分代表著無仝意涵。