消基會今仔日公佈2023南部十大消費新聞的排名，頭三名攏是佮食有關係，包括美式大賣場冷凍三種莓驗出病毒、欠卵危機、閣有美國豬肉流向的議題。另外影響民眾消費權益，親像詐騙閣有演唱會黃牛票的議題，也排有名。（此則新聞標題、導言、內文皆為臺語文。）
舊年四月，美式大賣場有三種莓果產品，予驗出有A肝病毒，超過4萬名的消費者受影響，這條新聞成做消基會2023年南部十大消費新聞的第一名，26消基會公布排名統計，頭三名攏是佮食的有關係，包括欠卵危機、閣有美豬流向，是逐家舊年上關心的議題。
消基會南區分事務所主委劉廷揚，「今年的這个方向，重點是佇民生經濟頂面，所以前三名攏是佮阮的食品有關的，其中佇後面嘛有，高雄一个知名的冰店，販賣的八寶冰有無爽快的狀況。」
2023年的消費新聞佮往過比較，疫情相關的議題已經攏無矣，大部份攏是民生新聞，而且閣增加詐騙、餐廳倒去、黃牛票等等的事件，顯示食安問題是逐家上關心，民眾也表示，除了民生，詐騙的議題，這幾冬是愈來愈濟，加減攏會注意這款新聞。
民眾，「欠雞卵，我是感覺講無欠雞卵，毋過菜市仔的雞卵有較貴。」
民眾，「是以民生必需、然後醫療、有無，閣有詐騙這个也會，但是像這寡無成，像這个因為好市多的物件，無一定講小家庭人數少，無一定會去消費。」
消基會南區分事務所表示，逐冬攏會針對國內重大消費新聞，由專家學者佮律師選出前十名，向望民眾回顧過去的新聞議題，有警誡的效果。