西港慶安宮，有臺灣第一香科的名聲，甲辰年龍年的王船已經做好勢矣。3年一科的西港刈香，除了遵照傳統辦科儀大典，廟方也共王船安龍目，共水淋佇龍目頂懸，才閣共水承予信眾取用。這項文化有百冬歷史。
選定良時吉日辦安龍目大典，廟方當咧共王船雙爿的龍目囥龍銀入去。這臺慶安第68號王船，用半冬的時間做總算做好勢矣。西港慶安宮除了完全遵照傳統辦儀式，安龍目了後，由廟方人員上王船頂，𣁳水淋踮龍目，才閣共水承落來，通予信眾取用保平安。根據了解，乞龍目水的習俗有上百冬的歷史，在地學校也和囡仔實際來行踏。
廟方講，王船有代表千歲爺出入天庭、凡間的交通工具，佇民俗祭典中嘛是重要的法器。王船頂頭攏總有13艙，主要是添載物件咧用的。其中，廟方開放頭二艙，予信眾會當添載，到時會參王船做伙化掉，有消災、賜福的意涵。
國定民俗西港香，有「臺灣第一香」之稱，西港慶安宮每3冬辦一科刈香，in的特色是「香醮合一」，嘛保存完整傳王醮科儀。廟方指出，舊曆4月11起鼓，向望逐家通來認捌有240冬久的刈香文化。