蔣渭水台客語漢詩吟唱賽 決賽指定〈意難忘〉

參賽選手 黃炫尊：「世間未許權存在，勇士當為義鬥爭。」

「蔣渭水台語．客語漢詩吟唱賽」，20位選手佇15的決賽拚懸低，指定吟唱四首臺灣漢詩，其中也包括雙十大典當中，楊烈所吟唱的「意難忘」。主辦單位指定本土漢詩來比賽，嘛是希望選手深入了解臺灣文學，嘛通知影先賢寫作的背景。比賽著等的選手嘛認為，有機會了解臺灣史是真好的學習。

參賽選手 林東諺：「舊年的時陣我提第三名，我感覺我只是共伊的音唸予準爾。但是今年我開始有去了解遐的作者的故事，因為歷史毋但是講故事爾。」

參賽選手 蕭宴煊：「咱會當用參加比賽的這个代誌，來了解進前的人，伊寫的彼寡詩詞是啥物款的意思，嘛會當閣較了解彼當時的人想法是按怎。」

一向關注文學、推廣漢詩吟唱的立法院長游錫堃也當場吟唱家己的作品"淬鍊"，這个作品就是咧描寫臺灣的歷史和民主化的過程，所經歷的創傷，也磨練出臺灣人的韌性。

立法院長 游錫堃：「兩蔣威權血淚滂，淬鍊臺人堅韌志，奮爭民主傲華疆。」

漢詩吟唱賽第一名就有獎學金20萬，是歷來相關比賽活動當中獎金上濟的，主辦單位嘛希望比賽會當一年一年辦落去，予愈濟少年家參與，毋但共母語講予好，深入了解詩詞的歷史背景，嘛是文化釘根真重要的一部份。