高雄民眾放貓仔顧厝 貓煞揤著電磁爐引火災

貓仔誠輕鬆會當對灶跤遮爾懸的所在跳落來，佇高雄有兩名查某，in做伙飼四隻貓咪，今年1月主人到北部耍，厝內底的貓咪煞揤著電磁爐的開關，引起火警，好加哉大樓戽水系統啟動，才無造成較大的傷害，毋過煞害大樓四台電梯攏歹去，仝一棟大樓住戶是誠不滿。

住戶講，「頂面是無爐具，毋過頂面有一个板子，無一定是不是隔熱加熱板，有一寡人為著莫換大量的鍋具，所以下底買一个較俗的導熱板。」

大樓主委李主委說明，「連彼个鋼索攏泡水、會有鏽蝕的問題，一寡電子的設備，伊那个攏無防水，一磕著水就需要換掉。」

根據住戶實際試驗，因為這馬IH爐攏是做感應面枋，有溫度的狗仔佮貓仔確實誠簡單就會揤著開關，這馬小家庭愈來愈濟，真濟民眾攏會選擇IH爐使用，電器業者就提醒民眾，使用煞，愛會記得將插頭拔起來，才袂發生事故。

電器業者補充，「除非你逐擺用煞攏要拔插頭，像這種你無拔插頭，無小心揤著開的話，這旁你無囥不鏽鋼上去是無熱的，袂有任何啟動，只會嗶嗶嗶爾爾，」

目前這兩位查某嘛予檢方依失火罪起訴，雖然這馬大樓兩台電梯修理煞，毋過閣有兩台猶歹去，大樓管委會當咧佮住戶繼續協調處理。