中秋透東北風 北部、東部落陣雨、西部西北雨

台北市雖然早起有落大雨，毋過下晡日頭真炎；未來幾工中秋連假期間，受東北風影響，東半部、北部食風面、三不五時會有陣雨；西半部天氣穩定，但是愛注意過晝的西北雨。

中央氣象署預報員曾昭誠，「食風面的東半部地區，閣有基隆北海岸，溫度小可無遐爾懸，大約31到33度，西半部猶是有，33到35度左右的高溫，28到30之間，水氣小可增加
所以食風面的大臺北地區，閣有東半部，規工的落雨機會較懸，雲也較厚，中南部地區閣有各地山區，攏猶是愛注意過晝雷公雨。」

按呢的天氣型態，連假以後就會改變。10月初一開始，有來自北方、較強的冷高壓落南，到時台灣北部溫度會小可仔下降、水氣也會較厚。

中央氣象署預報員曾昭誠，「10月初一佮初二這兩工，東北季風影響，食風面的基隆北海岸 大台北，甚至是倚桃園這个所在，規个東半部落雨會明顯增加，中南部猶是注意過晝雷公雨發展，北部佮宜蘭地區，高溫會落2到3度左右。

氣象署講，中秋若欲欣賞月娘，北部、東部雲厚較無適合，中南部較有機會；但是雲林以北、沿海地勢較低的所在，愛注意大流。另外目前佇台灣南爿，中南半島到關島、是一大片天氣無穩定的低壓帶、目前發展狀況較無明，氣象署估計連假了後，就愛注意敢會結做風颱。