烏克蘭國家交響樂團來臺 奏「望春風」送聽眾
發布時間：
更新時間：
有百年歷史的烏克蘭國家交響樂團，進前因為戰爭沒法度排練，落尾恢復排練，也用音樂來安慰民眾，全團79個人來到臺灣演出。in講看著臺灣人對怹的支持和熱情，真感動，in也準備臺灣的民謠望春風，欲獻予臺灣民眾。（此則新聞標題、導言、內文皆為臺語文。）
《望春風》是臺灣早期歌謠，這嘛是烏克蘭交響樂團送予臺灣民眾的禮物，頭一擺來臺灣演出的烏克蘭交響樂團，特別來到高雄開記者會，毋但準備望春風這首臺灣歌謠，指揮家tshuā領全團79位成員，嘛現場演奏烏克蘭國歌。
烏克蘭國交響樂團總經理 Oleksandr Hornostai，「這是阮頭一擺聽著這首歌，會當佇遮演奏，前幾个禮拜收著樂譜，烏克蘭人家己嘛誠佮意。」
烏克蘭國家交響樂團已經有百年歷史，舊年煞因為戰爭暫停演奏活動，不過in猶原繼續為避難所的民眾演奏，今年樂團來到臺灣表演、交流，也是向望會當傳達烏克蘭堅定力量，規个樂團開兩工時間才來到臺灣，高雄市長陳其邁嘛誠歡迎。
高雄市市長陳其邁表示，「這擺烏克蘭國家交響樂團特別到臺灣，阮嘛特別表達支持佮歡迎。」
烏克蘭國交響樂團總經理 Oleksandr Hornostai也講，「雖然阮有真濟親人佮好友，攏參加戰爭，對阮來講，阮音樂會的力量真大，嘛誠無仝款，向望透過音樂，會當予大家聽著音樂。」
烏克蘭國家交響樂團對11到13連紲三工，佇台臺北、臺中佮高雄演出，日後嘛會到全世界巡迴演出，向望透過音樂的力量，傳達烏克蘭人的堅定佮勇氣。
熊楚瑜/編輯
