文化部庄頭巡演 明華園嘉義公演「超炫白蛇傳」

扮演白蛇的演員吊著鋼絲，展現無仝的劇場表演佮氣勢。這齣超炫白蛇傳，是11冬前明華園戲劇總團推出，當時真轟動的戲齣。8月26這工，要佇嘉義縣政府頭前的廣場閣再一次演出。

明華園戲劇總團長陳勝福表示，「阮用短短的八工，搭一座比國家劇院閣較大的舞台，然後阮欲予三萬名坐佇椅仔的觀眾，甚至是徛的觀眾，第一排到最後一排，攏會當看著演員，完整的身段佮唱腔。」
 

文化部次長李靜慧：「文化部希望會當佇疫情結束了後，佇咱臺灣每一个庄頭內底，攏有辦法看著劇場級的，國際劇場級的演出。」

為著欲予11冬前的作品，有新的呈現，團長陳勝福就講，除了硬體的加強，總團新一代優秀演員會佮孫翠鳳做伙演出，也象徵明華園的傳承。

明華園戲劇總團主要演員孫翠鳳：「超炫白蛇傳這改閣演，但是這改演完以後，毋知影啥物時陣會閣再演，閣過十年彼當陣，阮這改是傳承青春版，翠鳳是傳承，青春攏是後壁遮，彼攏青春版的。」

嘉義縣政府表示，演出的時陣，現場有6組500吋的直播螢幕，6組噴水車的配置，計共3萬張椅子，邊仔嘛有6千外個停車位，高鐵站嘛會有車來接送民眾，希望予逐家會當借這改的機會，閣再一擺來欣賞這明華園的精彩演出。