刺殼仔著傷泅入八斗仔漁港 今復原裝GPS野放

一大陣人，做伙搬一跤柑仔色的大跤桶，沓沓往基隆潮境保育區去。大跤桶內底貯的，是今年5月予人發見，佇八斗仔漁港浮沉，一隻著傷的保育類動物玳瑁海龜，落尾送到桃園市佮民間企業合作的海龜救傷中心治療。

Xpark飼育部副理羅婕：「咱收容了後做一寡基本的血檢、佮電光檢查，落尾發見佇伊嚨喉，有一个魚鉤仔，就是金屬物仔，也有看著食道附近有淡薄仔潰瘍，可能是吞魚鉤仔的時造成的傷害，落尾咱就是少量飼，沓沓增加伊的胃口。」

經過3個月救治，恢復健康。保育人員沓沓共玳瑁海龜囥入大海，海龜就隨泅走，轉去大自然。這隻玳瑁海龜，是由中華鯨豚協會通報的，長期咧幫助海洋動物救援的協會表示，佇北台灣，in上捷接著石龜需要救援的事件，閣來就是玳瑁。

中華鯨豚協會秘書長曾鉦琮：「石龜需要救援，10件內底可能佔7件，玳瑁可能10件內底佔2件，漁業活動工具纏牢的，閣來就是糞埽的問題，予船挵著的問題等等。」

協會表示，彼當時佇八斗仔漁港除了這隻玳瑁，猶有救援一隻小抹香鯨，但是野放了後，猶是不幸死亡。這隻玳瑁估計野放了後，會轉去八斗仔附近的生湠地，伊身軀頂也已經予專業人員裝GPS，落尾會繼續追蹤伊的狀況。