紙風車劇團佮文化總會的「台灣歐趴 文化繞境」活動，昨昏是以快閃的方式，佇匈牙利出名景點漁人堡、英雄廣場演出。這寡所在攏是出名的觀光景點，有來自世界各地的遊客，攏停落來金金看，看哪吒鬧龍宮、看著臺灣文化的媠。（這條新聞標題、導言、內文是台語文）
臺語台記者 郭柏均：「記者這馬佇咧匈牙利的出名景點，布達佩斯漁人堡，佇遮有來自世界各國的遊客，會使講是來到布達佩斯一定愛來行行的所在。紙風車劇團這陣就選佇漁人堡，做哪吒鬧龍宮的快閃演出，現場是吸引濟濟遊客來看。」
文化總會佮紙風車劇團的「台灣歐趴 文化遶境」活動，選佇匈牙利的出名經典快閃演出，濟濟現場的各國民眾攏感覺真新奇，跤步停落來參演員互動。
外國民眾：「這真趣味，這色水、每一件代誌攏真讚！色水真讚、規个攏真讚！這真趣味！我真佮意，真讚！」
外國民眾：「你會使看著親像傳統的神，咧跳傳統的舞蹈，共這變甲閣較活潑！」
外國民眾：「我真佮意，我想應該愛有閣較濟公開的臺灣文化表演，我會想欲看in出現佇世界各國。」
臺語台記者 郭柏均：「除了漁人堡以外，紙風車劇團也去英雄廣場，佮佇匈牙利的烏克蘭跤球隊互動，展現臺灣佮烏克蘭徛做伙的精神。」
紙風車劇團團長 任建誠：「咱臺灣的表演團體，準講會使和地方，在地遮閣較濟的互動、和閣較濟的連結，因為像咱廣場的逐家嘛是來ﰣ迌，時間著愛閣較短。所以咱是重視和所有觀眾的互動、翕相，當然希望講咱臺灣紙風車劇團來到布達佩斯，嘛會當留一个足特別、足特別的記持。」
紙風車劇團表示，透過這擺佮文化總會的合作演出，除了是予來自世界各國的民眾，認捌台灣的文化，也望通透過這寡戲劇帶來的快樂，分享到世界每一个角勢。