黃俊雄、李淑德、吳靜吉 提今年行政院文化獎

經典布袋戲雲州大儒俠，捌創下收視率90%以上的成績，背後主要的大功臣，就是布袋戲藝師、黃俊雄。第42屆行政院文化獎、90歲的布袋戲國寶--黃俊雄是著獎人，頒獎典禮頂懸由後生黃立綱代替老爸來領獎。

布袋戲藝師黃俊雄後生 黃立綱：「其實父親的教誨佮傳承，最重要的就是咱這个戲劇部份袂使脫離忠孝節義，雖然技術、攝影方面攏已經進步矣，但是佇劇情的部份嘛是袂使脫離忠孝節義，這一直是阮謹守的部份。」

佇台頂演出的，是阮劇團為第三个著獎者吳靜吉所編的戲劇。吳靜吉是國內表演藝術的重要推手，伊創辦的蘭陵劇坊，其中濟濟團員攏成做台灣劇團界的出名人士。

表演藝術工作者 吳靜吉：「做老師無一定就愛佇教室內底，所以處處攏是教室、時時攏會當教冊，蘭陵劇坊就是我(對國外)轉來了後，有一陣少年人攏對戲劇有興趣，彼陣仔戲劇系足少的，我就去共指導。」

「台灣小提琴之母」的小提琴音樂家李淑德也著獎。李淑德對美國轉來台灣了後，就投入教學，教50幾年來，伊的學生遍佈台灣佮國際，伊的跤步嘛行過台灣每一角勢。

小提琴家李淑德學生 陳沁紅：「伊共我講臺北發展上好的所在，所以就較濟小提琴老師，但是中南部真正較欠缺，佇寒假、暑假，伊攏會共學生仔集合起來，會訓練樂團、會演出，50年前真正是（中南部)無遐濟選擇。」

第42屆行政院文化獎頒獎典禮，拜三佇台北市中山堂舉辦，由行政院長陳建仁頒獎。文化部表示，行政院文化獎是國內文化領域上懸的榮譽，目前計共93人著獎，攏是對台灣文化釘根有貢獻的人士。