招京劇老生唐文華唱歌仔戲 唐美雲創新說三國

《臥龍:永遠的彼日》，用歌仔戲來演三國戲，更加特別的是，出名京劇老生唐文華也加入演出劉備的角色。

京劇老生 唐文華：「唸出來彼咧氣口，完全是無仝的念法，唱調的音域，走腔佮京劇攏無仝，完全無仝攏重新學習」

唐文華笑講，家己完全袂曉講台語，背台語詞的時，就一句一句錄起來學，若無就向人請教。逐改的演出攏是新挑戰。唐美雲也表示，三國戲佇京劇舞台早就是經典，這改以歌仔戲來演，齣戲的起頭，是對孔明的後生想欲做家己，無想欲予人講他是孔明的囝開始。戲齣內容嘛講著劉備佮孔明、IN的後生，遮的政二代的心情。

唐美雲歌仔戲團長 唐美雲：「咱一般看戲佇傳統的三國內底，就是看著真濟咧戰爭相拍，毋是按呢爾爾，咱這改的臥龍，演的其實較以人性的內在去探討」

唐美雲進前做的孟婆客棧、做出新形式的歌仔戲，受各界呵咾。唐美雲講，伊一直希望將戲曲提升到藝術的層次，改變大眾對歌仔戲的印象，這改臥龍永遠的彼日，欲 tshuā觀眾感受君臣佮爸囝情。