新竹城隍廟、廟口管委會、公告5月開始，所有廟口擔頭仔賣的點心、逐項攏起5箍。管委會表示、因為過去5冬攏毋捌起價，原料價數、成本煞直直增加，有影是接載袂牢、才會調整價數。(本則新聞標題、導言、內文皆為臺文)
炒米粉、貢丸湯、閣有肉圓，予人看起來就想欲食，新竹城隍廟廟口管理委員會宣布，自五月開始廟口點心欲來起5箍，總共有20外間攏會調整，以後民眾想欲來食點心，就愛加攢一寡錢矣。
民眾：「物價，啥物攏起價矣，所以5箍我是感覺應該。」
民眾：「若是彼款小菜類的每一項攏起價，就是有當時全部點做伙就會變較貴。」
城隍廟廟口管委會表示，主要原因除了因為原料起價，用人的成本嘛提懸，閣加上過去六冬攏無調整過，真濟店家實在擋袂落去矣。
新竹城隍廟小吃管理委員會主委 柳宗禮：「阮差不多6冬無調整過，豬肉起價、電錢起價、倩人成本起價，薪水對160起到180箍，當然是擋袂牢。」
城隍廟點心擔頭家：「(原料)已經相連紲起價，過年前起價一擺、過年閣起一擺，這馬連環保杯仔嘛起價。因為攏是進口的原料，啥物物件攏起價。」
毋過嘛有賣早頓的業者，因為最近雞卵價數恢復正常，決定共原底已經調整的物件落5箍，民眾攏講這款的頭家實在真貼心。