本土猴珠添2例 疾管署:明日討論輕症自主管理

疾管署初六公佈新增加兩例本土猴珠個案，分別是佇台北市佮新竹縣的廿外歲佮五十外歲男性，有出現發燒、牽核仔、起紅疹、水疱等等症頭；有箍列7个高風險、佮27个低風險接觸者。猴珠疫情對舊年6月23到今，已經累積23例確診個案。

疾病管制署發言人 羅一鈞：「新增加2例，並頂禮拜新增加4例看起來是有較降，毋過也有可能是連假期間民眾延延就醫。清明連假真濟人出國，真濟人去日本。目前日本猴珠的疫情也當咧湠，愛煩惱敢會有帶病入境的病例，引起本土的疫情，所以這部份目前猶無放鬆的本錢。」

現此時猴珠確診者，愛蹛院隔離到堅疕落落來、才通出院，但是有患者認為關傷久。頂禮拜五，疾管署公佈專家會議討論結果，欲放冗隔離標準；初六疾管署記者會，羅一鈞表示，因為牽涉地方衛生人員的執行狀況，初七會參地方政府開會，十一才會說明新方案。

疾病管制署發言人 羅一鈞：「(隔離方案)咱有一寡腹案，毋過佇執行面會有一寡需要衛生局配合的，譬如講符合一定條件會使出門的時，啥人來幫忙評估佗一寡症狀若是有需要就醫、按怎安排等等。咱目前無按算比照居家隔離的措施來進行猴珠個案的管理，咱較偏向自主健康管理的模式。」

一罐細細罐、白色的玻璃罐仔，這就是猴珠疫苗。疾管署表示，4月初10下晡兩點，開放第二階段猴珠疫苗意願登記，估計提供2萬5000个名額，登記完成了後的注射的時間，愛閣看全台48間合作病院的安排。